Два дена по ред во Кочани и Штип се одржуваа протести на кои учествувале околу 60 лица. Од снимките може да се види како групата без соодветна дистанца од два метри, како толпа се движи низ Кочани, извикувајќи „Господ е голем“. Некои од нив, не ја почитувале ниту мерката за носење заштитна опрема, односно маските наместо на уста и нос ги носеле под брадата.
Од МВР велат дека протестот е најавен кај нив, но нема одговор дали има казнети учесници поради непочитување на мерките на Владата за заштита од коронавирусот. Причината за протестот била објава на социјалните мрежи од страна на скопјанец.
„Во четврток и петок, на подрачјето на СВР Штип, во градовите Штип и Кочани низ централното градско подрачје се одржал мирен протест на кој учествувале околу 60 лица. По поднесена групна пријава од страна на учесниците во протестот до ОВР Кочани, каде како причина се наведуваат постови со навредлива содржина против муслиманската вера постирани од страна на лицето И.Ѓ од Скопје“, велат од МВР за „А1он“.
Оттаму додаваат дека против скопјанецот кој ширел ксенофобичен материјал врз основа на верско убедување е поднесена кривична пријава од страна на Единицата за економски и компјутерски криминал.