Градоначалникот на СДСМ во Аеродром, Златко Марин, именувал нов в.д. директор на ОУ „Александар Македонски“ спротивно на условите пропишани во Законот за основното образование, обвини Васко Василевски од ВМРО-ДПМНЕ.
„Имено, согласно со одредбите од Законот за основното образование, за именување на лице кое ќе ја врши функцијата в.д. директор на основно училиште, потребно е покрај другите услови директорот да има и пет години работно искуство во воспитно-образовната работа. Па затоа, јавно го прашуваме градоначалникот на општина Аеродорм и новоименуваниот в.д. директор на основното училиште ‘Александар Македонски’ – Марија Калешов, дали го исполнува условот од 5 години работно искуство во воспитно-образовната работа?“, рече Василевски.
Очигледно, рече тој, Златко Марин ја продолжува праксата на неговата матична партија СДСМ за незаконско назначување и именување партиски функционери, притоа не земајќи ги предвид нивната стручност и компетентност, туку единствен незаконски критериум за одредено лице да биде избрано е истото лице да биде член на СДСМ.
Тој го повика Државниот просветен инспекторат согласно со своите надлежности, во најбрз можен рок да ја преиспита одлуката на Златко Марин за именување в.д. директор на споменатото основно училиште.