Претеничката Роза Топузова – Каревска, единствената засега која одлучи да не ја послуша одлуката за бојкот на Собранието седна во пратеничката фотелја, а од говорницата го критикуваше експозето на мандатарот на новата Влада, Никола Груевски.
Топузова кажа дека изминатиот изборен процес бил проследен со низа нерегуларности, кои дел од нив се нотирани во извештајите на ОБСЕ и ОДИХР, но нејасно е што бара во такво собрание и зошто го прифаќа мандатот ако нешто не е во ред со регуларноста.
Со самото тоа што таа седна во удобната пратеничка фотеља и дебатира од говорницата, веќе ја испрати пораката дека изборите се регуларни.
Топузова говореше и за неодвоеноста на партијата од државата, странските инвестиции, критикуваше и дел од програмата на ВМРО – ДПМНЕ во однос на отпишувањето на долговите на социјално ранливите граѓани, сето она што многупати е слушнато од страна на опозицијата и што најмалку се очекува дека таа може ќе го измени.
Оправдувањето дека нема да се приклучи на бојкотот, зашто сакала да се бори во Собранието денеска можеше да се види дека во најмала рака е комично. Топузова повеќе не е дел од опозицијата, и од нејзиното дејствување се оградија и матичната партија ЛДП и опозицијата.
Кого го претставува и што беше клучно за овој потег на пратеничката ќе биде појасно за извесно време.
Петар Клинчарски