Скопје утрово ечеше од трубачи во училиштата. Славеа полуматурантите кои синоќа биле на жур, а денес, место на час, играа оро пред училиштата на музика од трубачи.
„Синоќа славевме во диско, имавме супер жур, а денес дојдовме да прославиме и во школскиот двор. Некои од нас не ни спиеја. Отидоа дома само да се пресоблечат и дојдоа тука на клупите да ги чекаат трубачите“, ни рече еден од полуматурантите од „Димитар Миладинов“ во скопски Центар.
На трубачите им се израдуваа и сите други ученици од ова училиште. И тие денес немаат настава, одат на еднодневен излет, па половина час пред да тргнат се забавуваа со полуматурантите.
На полуматурантското оро се фатија и наставниците од училиштето. Им одржаа уште една лекција, овој пат за играње.