Невладините организации денеска, повторно протестираа против предлог законот за прекинување на бременоста. Тие потеницаат дека овој закон ги ограничува жените во слободното донесување на одлуката за прекинување на бременост, како и дека истиот не е подготвен во транспарентна процедура.
Организациите и граѓаните со протестот испратија јасна порака до Собранието на РМ да не дискутира за овој закон, а Министерството за здравство, како предлагач да го повлече.
„Идеата на дел од пратеничките кои имаат несогласување со дел од законот е да се предлагаат амандмани. Наш став е дека овој закон не може туку така да се промени“, изјави учесничка на протестот, и порача дека сите недоследности треба да се отстранат.
Од ХЕРА сметаат дека по вчерашната расправа министерот за здравство останува на ставот и нема да го повлече назад. Тие велат дека никој не бил вклучен во донесувањето на законот, посочувајќи дека од самиот почеток не беле вклучени.
„Ние сме навредени со тоа што се обидоа да не избегнат. Ова право никој не ни го дава, ние сами си го земавме, го прочитавме законот и излеговме на улица“, велат од ХЕРА.
Граѓаните гласно извикуваа: „Повлечете го законот!“, а носеа транспаренти на кои пишуваше: „Ако не веруваш во мојата одлука, како ми доверуваш дете“, „Мое тело, моја одлука“, „Министере не глумете лудило“, „Дали не прашавте“ и „Не ме штити сама од себе“.
Темјана Поповска