Студентскиот пленум повика на студентски марш, овој пат на марш за поддршка на Средношколскиот пленум, во четврток 23 април со почеток во 12 часот од платото на УКИМ. Студентите ќе маршираат кон Владата и таму ќе се сретнат со средношколците, соединети ќе продолжат кон Министерството за образование и наука.
– Студентскиот пленум добро го познава игнорантскиот однос на надлежните кој секојпат настојуваат да бидат единствениот фактор кој ќе ги креира политиките, правејќи се глуви за аргументите кои ги нудат другите општествени чинители. И’ порачуваме на владата конечно да ги напушти позициите на сила како аргумент во дебатите и во креирањето на политики во образованието, но и надвор од него, бидејќи креирање на политики зад затворени врати, ниту е одлика на сериозни политичари, ниту е во согласност со европските принципи на практикување на демократијата.
Студентскиот пленум се сеќава како бевме етикетирани, шиканирани, стигматизирани, ставани во контекст на различни партиски активности, исто како што сега им се прави на средношколците.
Очигледно е дека владата не може да научи од сопствените грешки. Потенцираме дека ние не сме изолиран дел од образовниот систем, а не сме ни глуви, ни слепи за работите што се случуваат. Токму затоа студентите нема да бидат мирни кога има неправда и затоа застануваат цврсто во поддршка на нашите идни колеги – средношколците, онака како што тие не’ поддржаа нас.
Ве потсетуваме господине министре дека се соочувате со најсплотените генерации кои не само што си ги знаат своите права, туку ќе го урнат ѕидот на наметнати политики, рече Христијан Поп Симонов од Студентскиот пленум.
Студентскиот пленум денеска потсети на настаните од изминатите месеци и како студентското движење за само неколку недели стана најмасовното движење во земјата
– На 10 декмеври 2014 и во најтемните сокачиња и најголемите „клиенти“ тивко и тајно ги шепотеа нашите пароли: „Не за екстерно!“ и „Сега ќе не слушнете!“, рече Иван од Студентски пленум
Средношколците бараат министерот Адеми да ги повика на средба за ги изнесат своите аргументи.
Тие бараат да се повлечат измените во полагањето на државната матура и да се врати стариот начин на полагање државна матура. Тие се против електронското полагање на предметите и против екстерното тестирање.
А.Б.