Цела недела министерот за внатрешни работи, Оливер Спасовски, СДСМ и Владата молчат дали осуден на затворска казна, пука врз полиција и е ослободен заради интервенција на Ариф Асани, функционер на ДУИ и втор човек во БЈБ, обвини на денешната прес-конференција Наум Стоиклковски од ВМРО-ДПМНЕ, во однос на пукањето во скопски Чаир.
Партискиот портпарол воедно посочи дека на социјалните мрежи се појавило видео од инцидентот направено од безбедносни камери.
„Сега Спасовски, Владата и СДСМ мора да одговорат дали е ова автентична снимка од пукањето во Чаир? Дали е ова снимка од безбедносната камера од системот ‘Сејф сити’ во Чаир? Дали лицето во сината кошула снимено од камерата на ‘Сејф сити’ е Ариф Асани, заменик директор на БЈБ? Дали сега и натаму ќе молчат и ќе го кријат случајот? Дали треба некој да биде смртно застрелан за да се отвори вистината за делувањето на МВР под Оливер Спасовски?“, посочи Стоилковски и запраша дали СДСМ и Владата се заложници на ДУИ само за гола власт.