Стотина специјализанти од Медицинскиот факултет се собраа денеска пред Министерството за здравство да го изразат револтот за игнорантскиот однос кон нивните барања и проблеми. Тие претходно поднесоа Петиција потпишана од 350 лекари специјализанти доставена до сите релевантни институции, а од министерството им беше ветено дека ќе биде решен нивнот проблем, тоа не се случило. Специјализантите велат дека со проблемите ќе биде запознаен и меѓународниот фактор.
Тие носеа пароли „Тодоров не е велики брат“, „Не сакам да бидам Јутјуб ѕвезда“, „Германијо чекај ме“ и велат дека досега законот е менуван пет пати, а нивниот проблем се уште не е решен.
– Проблемот на специјализантите е проблем на целото општество. Посебно е драматично дека ова се случува во време на голем одлив на лекари. Ја користиме оваа прилика да ги повикаме нашите професори, специјалисти и субспецијалисти да ни се приклучат во оваа битка, да ни дадат поддршка и да се солидализираат со нас, рече докторката Билјана Додева.
Специјализантите бараат да не се снимаат испитите, кое според законот од 15 февруари треба да стартува, како и емитување јавно на интернет, а бараат и работата да им биде платена, како и држурствата, кои според нив биле неплатени.
Докторите велат дека не се откажуваат од битката и дека ќе ги искористат сите расположливи демократски алатки до конечно исполнување на нивните барања и остварување на нивните права.
Александар Тодески