Скопје за време на продолжениот викенд по повод празникот Илинден наликува како во деновите кога беше воведен полициски час поради коронавирусот. Улиците се буквално празни, поминува само по некој автомобил, а топлото време дополнително придонесува да нема луѓе по улиците.
На социјалните мрежи се вртат коментари дека „конечно Скопје сега е чисто, а во Охрид е валкано“, а има и коментари од малиот број луѓе што останаа дома за време на празникот дека можат да уживаат во тишината на градот.
Скопје се испразни, но затоа се наполнија туристичките места, особено Охрид, Струга и преспанскиот крај, но не изостануваат ниту гостите по планинските места како Пелистер и Попова Шапка.
Годинава Илинден, меѓудругото, можеби најмногу ќе се памти по лошата слика што ја оставија домашните туристи, особено во Охрид. Гужви по плажите, непочитување на мерките за заштита од коронавирусот, расфрлано ѓубре по плажите и по улиците, уринирање во езерото е само дел од сликата во Охрид викендов, град кој буквално колабираше со оглед на бројот на гости и нивното непристојно однесување.