Предлог-законот за јазици кој е во собраниска процедура по скратена постапка, е противуставен и го урива духот на Охридскиот рамковен договор, изјави професорката од Правниот факултет, Гордана Силјановска-Давкова во дебатата на „Макфакс“.
Членовите од предлог-законот кои што се однесуваат на униформите, симболите и судските постапки, се носат со двотретинско, а не со обично мнозинство, вели Силјановска-Давкова. Дополнително, вели универзитетската професорка, предлог-законот за употреба на јазиците, не се повикува на регулатива или директива на ЕУ, за да биде со европско знаменце и да се носи по скратена постапка, а освен тоа е и во спротивност со деловникот на Собранието.
Професорката од Институтот за македонски јазик, Симона Груевска-Маџоска изјави дека никој од Владата не ги повикал на консултации пред Законот да влезе во собраниска процедура.