Нели власта на Груевски најави дека Скопје 2014 ќе чини 80.000.000 евра?!
Е толку чинат само 6 катни гаражи во Скопје.
Две од гаражите се недоправени, што значи ќе влечат уште народни пари, најмалку две од нив се во распад, но она што ќе ве шокира како и нас е следново: дека за само едно паркинг место плаќаме до неверојатни 50.000 евра, вели Петре Шилегов, портпарол на СДСМ.
Еве да ја земеме за пример катната гаража од Скопје 2014, Даме Груев. Чини над 30.000.000 евра (30.956.068 евра). Капацитетот на гаражата е 600-тини паркинг места. Ова значи дека граѓаните на Македонија, за само едно паркинг место, во оваа катна гаража, плаќаат 51.593 евра!
Катната гаража на Мито Хаџивасилев Јасмин, чини 12.000.000 евра. Има капацитет од 445 паркинг места. Тоа се речиси 30.000 евра (28.507 евра) за едно паркинг место!
Да беа само нелогичностите во илјадниците евра за едно паркинг место.
Ако веќе катните гаражи чинат милиони, барем да беа саглам направени. Но ја немаме ни таа среќа.
За патриотската гаража Солунски конгрес, позади Пошти, отишле 7.300.000 евра пари на граѓаните. По само месец и половина лифтовите почнаа да тресат, а на столбовите им затребаа стабилизатори.
Само некој километар понатаму, во мувла и влага се топат 5.700.000 евра што ги изеде гаражата кај Судска палата.
Значи, Скопје 2014 требаше да чини 80.000.000 евра а само за овие шест катни гаражи во центарот на Скопје, власта на Никола Груевски потроши над 72.000.000 евра. Досега!
