„Ужаснати сме од серијата терористички напади кои што се случија во Париз доцна синоќа и сочуствуваме со болката на семејствата и на сите граѓани на Франција кои што се обединети во пораката дека нема да дозволат да живеат во страв. Денес и претседателот на СДСМ, Зоран Заев, испрати телеграма на сочуство до францускиот претседател, г-дин Оланд за големата трагедија која што се случи на француската нација и која што го загрози начинот на живот во сите слободарски држави во Европа.
Факт е дека Р. Македонија е обединета во таа порака дека ваквото тероризирање, ваквата трагедија, ваквото насилство не смее повеќе да се случува“, рече на денешната прес конференција, Радмила Шекеринска, заменик претседателка на СДСМ.
„Сите сме сведоци дека тероризмот стана закана за начинот на којшто живееме и за универзалните вредности кои сите ги споделуваме на еднаквост, на слобода, на солидарност. Затоа денеска сакаме да испратиме уште една порака на солидарност кон францускиот народ, кон сите нејзини граѓани. Европа и сите слободарски држави се едногласни во пораката дека заедно ќе се спротиставиме на теророт.
Заедно ќе се спротиставиме на нивната цел да живееме во страв и да живееме спротивно на вредностите кои сите ги споделуваме. Р.Македонија и сите нејзини граѓани во овие моменти на тага се заедно со граѓаните на Франција и сметаме дека само со ваков начин, обединети со силата на овие универзални вредности слобода, еднаквост и солидарност ќе ставиме крај на оваа дивеење на насилството“, изјави Шекеринска.