Денеска, претставници на СДСМ, ги посетија најзагрозените населени места во струшкиот регион кои повеќе дена се без електрична енергија и вода, отсечени од светот со непроодни и завеани патишта.
Потпретседателот на СДСМ, Александар Кирацовски придружуван од Васко Ковачевски, пратеник и претседател на ОО СДСМ Битола, Томислав Тунтев, пратеник и претседател на ОО СДСМ Охрид, како и пратениците Јулијана Силјановска и Јован Митрески и претседателот на ОО на СДСМ во Струга, Даме Ложанковски, денеска во непосредни средби со граѓаните од Вевчани, Лабуништа и Октиси разговараа за проблемите со електричната енергија и непроодните патишта со коишто се соочуваат изминативе денови, како и за потребната помош.
Трошењето на буџетските средства во непродуктивни цели, како што се барокни фасади на МЕПСО, наместо во капитални проекти, како што е електро-енергетскиот систем, скапо чинеше илјадници наши сограѓани кои повеќе дена и тоа за време на новогодишните празници, на температура под нулата, останаа дома, без струја, без вода, во завеани и непроодни патишта, вели Александар Кирацовски.
И додека власта на Никола Груевски ја префрлаше одговорноста и формираше Кризен Штаб, затоа што среде зима снегот ги изненадил, нашите активисти беа неуморно насочени кон граѓаните и им ја понудија нашата помош.
Денеска повторно е овде дел од раководството на СДСМ, заедно со пратениците.
Се наоѓаме во охридско-струшкиот регион, каде што оваа ситуација беше и сеуште е најкритична да се видиме со граѓаните од Лабуништа, Вевчани и другите помали места да ја дадеме нашата подршка, да поразговараме со нив и да помогнеме `се што е во наша моќ.
Апелираме до власта во наредниот период многу поажурно и поефикасно да ја врши својата работа, а на граѓаните им посакуваме никогаш повеќе да не се повтори ваква новогодишна ситуација, односно да не се повтори ваква власт на којашто спомениците, фасадите и панормаските тркала во Скопје и се поважни од граѓаните на Република Македонија заврши Кирацовски.