На избирачките места 65 и 66 во Битола, претседателите на избирачките одбори на 24 март ги понеле дома избирачките списоци и печатите, за што ќе добијат кривични пријави, најави „Сојузот за иднината“ од Битола.
Во низа констатирани неправилности, злоупотреби и фалсификати, еден од најдрастичните беше случајот кога претседателите на избирачки одбори од избирачките места 65 и 66 неовластено ги понесоа дома избирачките списоци и печати – реагираа опозиционерите од Битола.
Иако од „Сојузот за иднината” реагирале со претставка уште пред почетокот на изборниот ден, сепак гласањето се одржало по лична асистенција на претседателот на Општинската изборна комисија од Битола.
Во Кривичниот закон, во член 164 стои: „Секој оној што ќе влијае на кој било начин врз изборниот материјал, особено во случај кога тоа го прави член на изборачки одбор, ќе сноси кривична одговорност со предвидена казна затвор од најмалку 5 години“ – рече Благојче Котески.
Опозициската коалиција ќе поднесе кривична пријава против Цветанка Ристевска, претседател на ИО број 65, вработена во Општина Битола како портпарол на кандидатот
за градоначалник на ДПМНЕ од Битола, како и против Татјана Стаменковиќ, претседател на ИО 66, вработена во ОУ Коле Канински од Битола.