Вечерва во Скопје започна „Маршот за правда“ во организација на владејачката СДСМ. Граѓанскиот марш започна пред Собранието, од каде насобраните граѓани предводени од лидерот на СДСМ, Зоран Заев, членови на партијата и коалиционите партии носејќи транспаренти се упатија пред комплексот судови во Скопје, каде свое обраќање ќе има лидерот на партијата Зоран Заев.
Како што најавија од партијата, маршот под мотото „Чекориме за правда“ се одржува со заложба за градење силно, независно и професионално обвинителство и судство. Токму затоа, како што рекоа од партијата, маршот завршува пред судот, што би претставувало симболика за правни разрешници и крај на криминалните дејствија во нашата држава.
Маршот следува откако вчера попладне пратениците го изгласаа Законот за јавно обвинителство, како и Законот за Совет на јавни обвинители.
