Со вчерашната пародија на младите од ВМРО-ДПМНЕ тие само го потврдија агресивното и недемократско однесување на власта, која иако се обврза за фер и демократски избори, тоа не го почитува, обвинуваат од битолскиот СДСМ.
Според Изборниот законик, забрането е во кампања да се инволвираат малолетни лица. Но, тоа очигледно не важи за ВМРО-ДПМНЕ, велат од СДСМ.
Младите – малолетници, членови на оваа владејачката партија, вчера лепеа нивни плакати на билборд на „Сојузот за иднината” во Битола, што е казниво според Законот.
Од СДСМ –Битола денес најавија соодветни пријави
„Затоа ние сме приморани против нив да поднесеме прекршочни пријави до СВР –Битола и до Основниот суд во Битола.
– До градоначалникот Владимир Талески и до нашите колеги од ВМРО-ДПМНЕ апелираме да покажат разум и да ги почитуваат правилата за фер и демократски избори, бидејќи и тие можат да сносат одговорност за некоректното однесување и инволвирање на малолетни лица во изборна кампања“, рече Златко Алексовски, кандидат за советник од Сојузот за иднината.