Самоорганизираното граѓанско движење „Протестирам“, ќе продолжи да протестира се’ додека целата влада не си поднесе оставка. Тие сметаат дека оставките на министите Јанкуловска и Јанакиевски и директорот на УБК, Мијалков, е победа на граѓаните, но не се задоволни само од неколку оставки и бараат оставка од целата влада
– По оставките на Јанкуловска, Јанакиевски и Мијалков е повеќе од јасно дека самоорганизираното автентично движење од страна на граѓаните кое започна од 5 мај, вродува со плод. Ѕокму тие настани од вчера, се причина ние денеска да побараме уште помасовно, погласно, заедно сите солидарно, во 18 часот пред Владата да го искажеме нашиот револт и да ги повториме нашите барања.
Не само оставки на поединци, туку целосна оставка на владата. Притоа, не само да понесување на политичка одговорност, туку и правна одговорност за сета корупција, криминал и за сето неуставно и неетичко однесување во последните неколку години, рече Анастас Вангели од граѓанската иницијатива „Протестирам“
Тој го потенцира нивното второ барање како особено важно, а тоа е итно ослободување на сите активисти уапсени од 5 мај наваму. Се работи за 11 лица во притвор и едно лице во домашен притвор.
– Нашето трето барање е моментот да не се користи за предвремени избори – не нови, уште едни предвремени шарлатански, лажирани избори, туку формирање на преодна влада која што ќе има мандат да ги демократизира институциите, да го исчисти избирачкиот список и да организира фер и демократски избори, рече Вангели.
На граѓанското движење се приклучува и Студентскиот пленум кој повика на мирни и ненасилни протести пред Влада.
– Денеска имаме второ барање а тоа ослободување на сите наши притворени колеги, со тоа што протестот ќе помине и кај Основен суд, кој студентскиот пленум го смета за нелегитимен, рече Орхан Сулејмани од Студентскиот пленум.
Протестот на 5 мај, пред Владата беше предизвикан од објавувањето на политичката бомба на Заев во која се обелодени дека МВР и други безбедносни институции се обиделе да го сокријат убиството на Мартин Нешковски во 2011 година.
А.Б.