Шест лица се приведени, а едно е повикано на службен разговор по денешните полициски претреси поврзани со видеото што се појави на социјалните мрежи, на кое се гледа пукање за време на семејна веселба во гостиварското село Добридол.
Од СВР Тетово информираат дека при претресите на повеќе локации биле пронајдени и одземени оружје и муниција.
Претресите започнале околу 18 часот. Кај И.С. (21) од Добридол бил извршен претрес, а неколку минути подоцна и кај А.И. (30), при што бил пронајден и одземен гасен пиштол. Во исто време бил извршен претрес и кај И.Б. (25).
Во 18:15 часот полицијата извршила претрес во домот на Б.А. во Добридол, каде биле пронајдени 30 куршуми за гасен пиштол, додека во дворот биле најдени 27 испукани чаури од гасен пиштол и еден патрон за ловно оружје. Поради тоа, приведени се Б.А. (46) и неговиот син М.А. (21).
Подоцна, при претрес кај Т.М. (26), полицијата пронашла и одзела пиштол со осум куршуми, ловна пушка со седум куршуми и гасен пиштол. Т.М. е лишен од слобода, додека С.М. е повикан на службен разговор.
Сите приведени се задржани во полициска станица, а по целосното документирање на случајот против нив ќе бидат поднесени соодветни пријави.