По вчерашното панично пазарување на граѓаните низ маркетите, денеска рафтовите повторно се полни. Скопјани по вчерашниот прв потврден случај на коронавирус, денешниот ден го поминуваат сосема нормално.
Нема празни рафтови и испаничени купувачи, фреквенцијата на луѓе низ маркетите е вообичаена како во секој друг ден.
На рафтовите единствено може да се забележи дека скопјани најмногу пазареле средства за чистење и дезинфекција, поевтини сапуни за раце и поевтино масло за готвење.
Хируршки маски може да се најдат во некои од аптеките, но максималниот број кој еден човек може да го купи е пет маски. Една таква маска чини 15 денари.
Во некои од аптеките не може да се најдат хируршки маски, но аптекарите велат дека тоа е поради дистрибутерите кои во изминатиот период не увезувале вакви маски.
Низ скопските улици едвај може да се види некој кој носи било каква маска на лицето.