Во 2 часот по полноќ, по шест часа распит, демонстрантот од Шарената револуција кој беше приведен поради сомнение дека во пикапот “имал оружје употребено за оштетување културно наследство“ беше пуштен на слобода, а вратен беше и автомобилот. Одземени биле неотпакувани бои и гуми од чаталот.
Џовани бил приведен заради прибирање докази за оружје употребено за оштетување културно наследство. Портата ли ви е културно наследство? Епа, грда ви е портата, па ја разубавуваме! Запамтете, клучното оружје на оваа борба не е ни чаталот, не се ни боите, ни балоните, ни пикапот. Ние сме клучното оружје, граѓаните! Ние со нашите глави и тела. Ќе не приберете ли сите, напишаа на фејсбук од Шарената револуција.
Откако го вратија автомобилот, демонстрантите кои останаа пред полициската станица „Пролет“ пуштија музика, а малку подоцна, откако од станицата излезе и приведениот, тие си заминаа.