Граѓаните кои ми доаѓаат се веспомошни затоа што знаат дека институциите не им служат на нив, туку им служат на партиите, рече Уранија Пировска, извршен директор на Хелсиншки комитет – Македонија, денеска во антивладиниот камп кој таа го нарече камп на слободата.
Пировска заедно со уште неколку граѓани им се обрати на камперите во рамки на граѓанскисот пленум кој се одржува секој ден на тема “Зогум Никола”.
– Немав дилеми кога протестирав поради убиството на Мартин Нешковски, кога протестирав поради апсењето на Кежаровски, кога протестирав заедно со паркобраните и кога умре малата Тамара, затоа што протестирав поради бескрупулозноста на институциите. Тие жртви ги отсликуваат симптомите на овој режим – рече таа.
Додека властите градеа споменици, посочи, кај мене доаѓаа луѓе кои не можат да си ги прехранат сопствените деца.
– Тие ја добија владата за да му служат на народот, а им служат само на сопствените цели. Никола Груевски и неговата свита ќе треба да одговараат кривично за делата што ги сторија, за се она за што сега имаме докази. Ќе останам доследна на овие барања. Ова што ни се случува е продукт на неказнивоста која стана феномен во нашето општество. За да се врати демократијата политичарите мора да сфатат дека треба да му служат на народот и дека како сите граѓани во оваа земја треба кривично да одговараат за своите дела – порача Пировска.