Фирмите ангажирани на проекти од државата не ги почитуваат препораките на владата. Иако од Министерството за здравство беа јасни-да се реорганизираат работните обрски на работниците кои работат на отворено или да се избегнува периодот од 12 до 17 часот за работа, на плоштадот во центарот на градот се работи турбо.
Во 13 часот кога екипата на А1он прошета низ плоштадот, работниците на пеколни температури го поплочуваа просторот околу споменикот „Воин на коњ“. Тие ги заменуваат старите плочи со нови токму во периодот за кој Министерството за здравство препорача да се избегнува работа на отворено.
Со исто темпо на пеколни температури се работи и на зградата на офицерски дом но и на промената на фасадата на зградата „Сити Галери“ за да го добие новиот изглед во барок за проектот „Скопје 2014“.
Иако во заштита на работниците владата носи препораки, ретко или никогаш не ги санкционира оние кои не ги почитуваат.
Иронијата во препораката е тоа што не ја почитуваат токму фирмите ангажирани од државата.
До вторник од работните обврски ослободени се трудниците и хронично болните над 60 години.