12 Август Меѓународниот ден младите, подмладокот на СДСМ од Крива Паланка го искористи за пародија.
-Меѓународниот ден на младите, за нас, младите во Македонија, а посебно од Кривопаланечкиот регион е како и секој друг ден, синоним на маргинизираноста, инфериорноста, немањето можности за сопствена реализација и бесперспективност во државата во која живееме.
Во време кога партиската книшка е еквивалент на бугарскиот пасош, во време кога 250 000 млади луѓе ја напуштија државата само во последните 10 години, а уште 100 000 чекаат прва прилика со полни куфери, а државата се уште нема идеја како да го запре „одлив на мозоци“, велат од подмладокот на СДСМ од Крива Паланка.
Спротивно на тоа, наместо да се инвестира во иднината на младите генерации, се инвестира во споменици, жални врби, панорамски тркала.
По тој повод го организиравме денешниот Флеш моб, со кој сакаме да го покажеме нашиот револт против индолентната политика на власта по однос на младинската проблематика.
Ние младите го креваме нашиот глас и се спротивставуваме на оваа појава со тоа што ги повикуваме сите млади да ни се придружат и поддржат во напорите за креирање сопствена и сигурна иднина, тука на овие простори, а не надвор од државата.
Истовремено ги повикуваме владата и ВМРО ДПМНЕ реално да се зафатат со проблемите и положбата на младите.
Ги повикуваме наместо субвенционирани летови кон странство во еден правец да поработат на економскиот развој и просперитет на Македонија, а посебно Источниот регион.
Наместо секојдневните реклами и имагинарно отворени работни места реално да се фатат за работа, и настрана од првиот поглед на црвената книшка да фрлат око и на другиот дел од Македонија.
Ги повикуваме, да го отворат пазарот надвор од партиските стеги и платени пропаганди.
Ние за разлика од конформистички настроената црвено обоена младина бараме еднакви шанси, еднакви можности за докажување и селекција.
Бидејќи само така, со реална конкуренција, со компетентност, иновации и претприемачки дух Македонија може да оди напред.
Младино нека ти е честит 12 ти Август, меѓународниот ден на младите, со искрена надеж дека во скоро време ќе имаме можност вистински да му се радуваме и на овој ден и на животот“, велат СДСМ Крива Паланка.