Околу стотина членови и симпатизери на СДСМ од Охрид денеска одржаа мирен протест пред НУ Градска Библиотека Григор Прличев.
„Протестираме против овој режим и оваа диктатура со активен бојкот пред сите институции кои се под капа на државата“, рекоа од СДСМ.
„Во Охрид протестираме пред библиотеката за да афирмираме еден огромен проблем со кој се соочува Охрид, но и да ја потсетиме министерката за култура на нејзините лажни ветувања кои ги дава две и пол години дека проблемот со библитеката ќе се реши. Срамно и жално е град на културата како што е Охрид да нема библиотека, а со тоа да пропаѓаат и 150 000 книги кои се сместени во пакети на површина од 150 метри квадратни“, рече пратеникот од СДСМ Митре Велјаноски.
Велјаноски најави дека протестите низ цела Македонија продолжуваат и понатаму се до решавање на политичката криза во земјава која можно е да се случи само со предвремени парламентарни избори.
„Цела Европа и цел свет и сите сериозни луѓе сватија дека во Македнија има огромна политичка криза после црните настани од 24 декември и изгледа дека сите се позагрижени за состојбите во Македонија отколку владата и премиерот Груевски кој упорно глуми дека ништо не се случи во Македонија и дека се е нормално. Напротив, сите знаат сите видоа колку е сложена ситуацијата во земјава и колку се нема слух во владејачкиот врв“, рече Велјаноски.
На прашањето дали очекува СДСМ и ВМРО да бидат притиснати од страна на Европските челници кои денеска се во Скопје, Велјаноски рече дека СДСМ нема што да биде притиснат бидејќи тие го дадоа најконструктивниот предлог, да се одложат локалните избори и еден глас повеќе на локаните избори да значи и закажување на предвремени парламентарни избори.
„Јас се надеем дека ќе се најде договор и решение и не верувам дека може да бидат толку несериозни и неодговорни и да ја стават иднината на Македонија на коцка“, потенцираше пратеникот Велјаноски.
Мики Трајковски