„За жал и покрај сите наши обиди и покрај сите настојувања на СДСМ преку борба на идеи,размислувања, програми да му дозволиме на граѓанинот на слободен и демократски начин да одлучи кој сака да го води, тоа е невозможно. Уште во првиот круг на претседателските избори власта ни покажа на сите дека нема да го почитува ниту Изборниот закон, ниту другите закони во РМ. Имаше невидени злоупотреби од страна на сите државни институции,а непрофесионалноста на медиумите го достигна врвот.
Во последните две недели тоа ги надмина дури и сите наши најцрни очекувања.
Оваа власт, на чело со ВМРО-ДПМНЕ и Груевски едноставно го извади на виделина својот диктаторски карактер. Без ниту збор одговор на големите криминали и злоупотреби што ги направил , Груевски даде наредба да се удри со сите недозволени средства ,за да ја добијат Струмица на нечесен начин. Нашата општина е полна со инспектори од сите области , шетаат и се закануваат , се одземаат лични карти , се делат пари, се потпишуваат лажни договори за откуп, се нудат вработувања, летаат записници за казни па дури и притварање на луѓе. Го малтретираат сопствениот народ до коска.
Едно е сосема јасно, ова не се обични избори, ова се избори за СЛОБОДА И ДЕМОКРАТИЈА. Ова се избори кои ја решаваат судбината и иднината на РМ.
Затоа Ве повикувам сите. Да излеземе и да го дадеме својот глас. Да гласаме слободно и демократски. Тоа е наше право, но и граѓанска должност. Од секој од нас зависи судбината на оваа земја и судбината на граѓаните. Зад параванот ние сме господари на нашата слобода и иднина. Ние решаваме каде ќе се движи Р. Македонија, кон просперитет или кон пропаст“, изјави Панче Орцев, кандидат за пратеник на СДСМ.