Општина Центар, во соработка со Центарот на заедницата на општината, денеска ја промовираше првата социјална карта.
Ова, рече градоначалникот Андреј Жерновски, е исклучително важен момент, бидејќи содржи материјали кои им недостасуваат на сите институции. Овој документ ги претставува социо-економските и демографските карактеристики на општината.
„Транспарентноста, која ја промовиравме на почетокот на мандатот, ја применуваме во целокупното работење, а оваа социјална карта го потврдува транспарентното работење. Ова е прв пат во историјата на општина Центар да имаме ваков документ, кој е стратешки. Во време кога нема попис во државата, вистинска реткост и благодет е да се има ваков документ“, рече градоначалникот на општина Центар, Андреј Жерновски.
Овие материјали ќе служат за да се идентификуваат потребите на граѓаните и да се реализираат за поквалитетен живот.
Ова треба да е задача на сите единици на локалната самоуправа, посочи Дончо Герасимовски, секретар на општина Центар.
„Оваа социјална карта е за потребите на граѓаните и во име на транспарентноста, за да се реализираат потребите на жителите на општина Центар“, рече Герасимовски.
Анализите кои произлегуваат од социјалната карта се однесуваат на: демографија, домување, пазар на труд, образование, пензиско и инвалидско осигурување, здравствено осигурување и социјална и детска заштита.