Одѕивот на првиот круг од претседателските избори до 17 часот попладнево изнесува 44,18 отсто, според податоците на Дражавната изборна комисија (ДИК) од 1788 избирачки места.
Од вкупно запишани 899.977 гласачи на овие избирачки места гласале 397.612 избирачи, односно 44,18 отсто, информираше на прес-конференција претседателот на ДИК Александар Даштевски.
Најголема излезеност од 67,19 отсто има во Новаци, а најмала во Пласница 15,5 отсто.
-Гласањето досега се одвива мирно во сите избирачки места, рече Даштевски.
Во споредба со првиот круг од претседателските избори од 2019 година, до 17 часот на овие избори има поголема излезеност за околу девет отсто.
До ДИК досега се доставени 308 приговори за заштита на лично избирачко право, од кои 75 се усвоени и на избирачите им е овозможено да го остварат правото на гласт, 25 се отфрлени како неуредни, 38 се одбиени, а останатите се во обработка.