Пукнатини и пробиена пластика се гледаат на обиколницата кај Стајковци која од вчера е пуштена за возила. Граѓаните велат дека слабата пластика е најголема причина за огромната количина на вода која ги поплави нивните домови.
Иако во употреба, обиколницата се уште не е сигурна за возење. На неа се уште стојат искривените знаци, а на неколку делови е пукнат, или целосно отстранет и асфалтот, а пластики од обиколницата се забележуваат и на педесетина метри подалеку од оградата, на половина метар од поплавените куќи.
Освен домовите, уништени се и нивите на граѓаните. Калта направила нов слој од метар и половина над нивите, а според миризбата која се шири, таму најверојатно се и телата на нивните животни.
Граѓаните велат дека не им треба ништо повеќе освен финансиска поддршка за штетата која невремето им ја нанесе. Сепак, никој се уште не дошол да види за колкава штета станува збор.
– Не бараме којзнае што. Никогаш не сме ни барале. Бараме да ни дадат онолку колку што ни следува. Имам метро и половина кал над нивата, се што имав насадено, се е уништено, вели зад камерите еден од жителите.
Тие истакнуваат дека немаат потреба од вода, храна и пелени, единствено што бараат е да се изврши проценка на штетите и финансиски средства од владата за обнова на куќите со оглед дека се е уништено.
Александар Тодески