Нова надеж за лицата со мултиплекс склероза во Македонија е пристапот до новиот иновативен, биолошки лек „окревус“ (Ocrevus) или „оцрелизумаб“ за лекување на активни форми на релапсна мултипла склероза и прв и единствен лек одобрен во светот за третман на лица во рана фаза на примарно прогресивна мултипла склероза. „Окревус“ е лек на фармацевтската компанија „Рош“ кој овозможува значителна супресија на сите маркери за активност на болеста и прогресија на инвалидноста, а воедно има поволен профил на односот помеѓу користа и ризикот за пациентите.
Лекот вчера беше промовиран пред стручната јавност. „Претставувањето на лекот во Македонија претставува значаен напредок во лекувањето и почеток на нова ера за пациентите со мултипла склероза во Македонија. ‘Окревус’ е веќе одобрен во повеќе од 60 земји во светот, а до денес со него се лекувани повеќе од 40.000 пациенти“, изјави д-р- Александра Ивановска, директорка на „Рош Македонија“.
Лекот во Македонија е одобрен во април годинава од страна на Агенцијата за лекови и медицински средства (МАЛМЕД), а веќе е почната постапката за набавка на лекот за 13 пациенти.
„Од мултипла склероза во светот боледуваат повеќе од 2.5 милиони луѓе, а во Македонија бројот на лица е поголем од 1.200. Од оваа болест најчесто заболува младата популација, на возраст од 20 до 40 години. Mултиплекс склероза е хронична и инвалидизирачка болест, со трајни последици врз здравјето, мобилноста и инклузијата на пациентите во секојдневните активности и работоспособноста, но и голем товар за нивните семејства и општеството во целина. На Клиниката за неврологија во моментот се лекуваат 409 пациенти, од кои најголемиот дел 372 се на третман со терапија од прва линија (интерферони), a 37 на терапија од втора линија“, изјави д-р- Иван Барбов, специјалист по неврологија и директор на Клиниката за неврологија.