Оваа недела во функција се враќаат затворените трговски центри, центрите за едукација, обука, семинари на возрасни, организација на седници на органи за управување и конференции, автошколи, испитни центри, спортски тренинзи на отворено, индивидуални спортови како тенис и спортски и други обложувачници, соопшти министерот за здравство Венко Филипче. Трговските центри ќе се отворат, но оваа недела не смеат да нудат угостителски услуги, а обложувачниците ќе работат само преку шалтер.
„Сето ова е согласно критериумите препорачани од Комисијата за заразни болести. Сите субјекти мора да се придржуваат до дистанцата, носењето на заштитни материјали и одреден број на присутни во локалите односно на местата. По следењето на епидемиолошката состојба откако ќе се вратат во функција сите овие економски оператори следната недела во предвид е да се препорача и отворање на угостителските објекти со послужување, спортските тренинзи на отворено за колективните спортови и повторно после епидемиолошката анализа и следењето на состојбата неделата што следува после оваа, игрите на среќа во казина, автомат клубови , тренинзи во затворени спортски објекти и базени, работа на теретани и фитнес клубови и хотелски објекти“, најави министерот Филипче.
Овој план Комисијата за заразни болести денес ќе го поднесе до Владата и за него Владата дополнително ќе расправа. Помеѓу примената на сите овие препораки детално ќе се следи епидемиолошката состојба во земјава
Денес беа регистриран десет новозаболени од коронавирусот, а Комисијата за заразни болести ја оценила состојбата со вирусот кај нас како стабилна.