Вработените на МЗТ Леаринца веќе три недели протестираат поради неисплатени плати, придонеси и здравствено осигурување, како и кршење на многу закони во фирмата.
– Протестиравме пред фирмата, но откако немаше никаков одговор од работодавците, почнавме да пријавуваме во сите инспекции, пријавивме во Управата за јавни приходи, Министерство за труд и социјална политика, трудова инспекција, јавен обвинител, во финансова полиција, но немаме никаков одговор дали преземале нешто и што се случува. Бараме од институциите да се ангажираат да испитаат дали и како таму се работело, ништо друго не бараме од државата. Бараме од владата, имаме доставено барање за средба со претседателот на Собрание, со премиерот, затоа што од институциите на понизок ранк нема одговор, рече Љупчо Чекаловиќ, претседател на синдикалната организација.
Вработените велат дека откако почнале да протестираат на улиците, добиле одговор од кабинетот на Емил Димитриев дека сите институции се на терен и дека инспекторите работат на случајот, но ефект до сега нема.
– Оставаме на институциите, тоа е и нивна должност сами да вршат контрола без наше барање. Кај нас се работи незаконски со години, никој не преземал ништо, рече Чекаловиќ.
Револтирани од нефункционалноста на институциите, вработените во МЗТ Леарница велат дека доколку и после пријавите не се преземе ништо, ќе одат до крај со порадикални мерки.
Александар Тодески