Претседателот на ВМРО-ДПМНЕ, Христијан Мицкоски смета дека чествувањето на Гоце Делчев е како заробеници во сопствена држава. Според него, се случува „примитивна естрадна политика“. Тој посочи дека од една страна е горд, од друга разочаран поради ваквото чествување на Делчев.
„Чуден ден е денеска. Две чувства имам кај мене. Првото е почитта кон македонецот Гоце Делчев за тоа што го направил за македонскиот народ. Ние сме горди што имаме еден таков човек да го славиме и е дел од нашата историја и нашиот историски ген. Тоа е чувство на задоволството и среќа кај секој Македонец. И второто е чувството на разочараност, кое го имам чекорејќи од првата кон втората барикада до оваа црква. Наместо да се зближуваме и да се зголемува пријателството ние сме подалечни од било кога. Пред 68 месеци ветуваа живот, дека Македонија ќе ја однесат во Европа, денеска сме по нивото на корупција со Тунис. Денес имате безбедносни мерки од прв степен, хеликоптери надлетуваат како во воените времиња“, посочува Мицкоски.
Тој објасни дека ќе има повеќе делегации од ВМРО-ДПМНЕ. Протоколот налагал да доаѓаат една по една на гробот на Гоце Делчев.