Носителот на листата на СДСМ и коалициските партнери во изборната единица 4, Хари Локвенец, реализираше повеќе средби со граѓаните во неготинскиот регион.
На градскиот пазар ги слушаше проблемите на продавачите и купувачите, на средбата со пензионерите, нивните проблеми, а во населбата „Саат кула“ проблемите на граѓаните кои живеат во овој дел од градот.
Заеднички и најголем проблем за сите е масовното иселување на младите. Локвенец рече дека СДСМ нуди мерки со кои ќе го запре егзодусот на младите.
-Предвидовме повеќе од 50 мерки за решавање на проблемите на младите. Една од мерките „Гаранција за млади“, проект кој се спроведува во земјите членки на ЕУ, а кој нуди доквалификација и професионално образование на младите спрема потребите на економијата и компаниите.
– Наспроти проектот на масовно студирање во нестандарни услови, го нудиме проектот на институти во кои ќе се дообразуваат и квалификуваат младите за да можат со своето образование и вештини да одговорат на потребите на стопанството и на економијата.
– Покрај ова го нудиме проектот за субвенционирани трошоци на компаниите при вработување на младите до 29 години, во рок од една година, под услов да ги задржат најмалку две години.
– Ја нудиме и можноста за субвенционирање на проекти кои предвидуваат вработување на млади луѓе во помалите градски и селски средини, каде е многу потешко да се најде работа.
– Основата на нашата програма за млади луѓе е да креираме, да создадеме младина која има знаење и вештини кои ќе одговорат на потребите на стопанството и ќе придонесат во развојот на економијата на Македонија, рече Локвенец.
Поладнево, Локвенец ќе ги слушне проблемите и ќе ја промовира програмата на СДСМ пред граѓаните на Демир Капија.