Исклучените граѓани од парно греење од денешниот протест порачаа дека во системот може повторно да се приклучат само доколку се создадат добри услови, односно се укине монополот и на пазарот се понуди фер цена за греење.
„Бараме да се укине монополот со парното греење, ние предлагаме државната компанија ЕЛЕМ да го грее цело Скопје. Оваа наше барање му го соопштивме и на градоначалникот на град Скопје, Шилегов. Кажавме и остануваме на ставот, дека не е целта граѓаните на сила да ги вратиме на парно греење и да им ги конфискуваме становите“, изјави Маријан Ненов, активист во здружението „Но пасаран“.
Оштетените граѓани реагираа на информациите дека се грееле на дрва и така го загадувале воздухот во Скопје.
„Најодговорно тврдам дека никој од овие луѓе не се грее на дрва. Тоа е замајување на јавноста дека ние сме загадувачите, не е точно. Се грејам на струја затоа што тоа ми е најевтината варијанта. На парно може да се приклучам само ако цената биде пониска“, рече Зоран Стефановски, еден од граѓаните на протестот.
На протестот се собира и потписи за враќање на извршителите во судовите. Ова следи откако добар дел од граѓаните ги изгубија случаите и добија налози за присилна наплата за неплатените паушали кон БЕГ. Вакви, судски постапки беа покренати против 20.000 граѓани.