Од владејачката партија ВМРО-ДПМНЕ се уште не им кажале на камперите пред Собрание дека партиските лидери вчера постигнаа договор според кој премиерот, Никола Груевски ќе поднесе оставка на крајот на годината и дека опозициската СДСМ ќе влезе во пет министерства.
И покрај тоа што премиерот ќе ја напушти функцијата четири месеци пред изборите, тие велат дека Груевски не поднесува оставка и дека ништо не се менува.
-Не е вистина дека ќе поднесе оставка. Не, не, не погрешно сте ја сфатиле неговат изјава на прес конференцијата. Договорот, колку што слушнав јас, е дека 100 дена пред изборите всушност Владата ќе ја води член на ВМРО-ДПМНЕ чие име не било спомнато во негативна конотација. Овој договор е победа на премиерот Груевски и на ВМРО ДПМНЕ. ВМРО-ДПМНЕ победувале и пак ќе победуваат. Договорот прочитајте го во целост и ќе видите дека не е вистина. Министрите од ВМРО-ДПМНЕ ќе продолжат да си работат нема никакви оставки и нема никакви отстапки – изјави еден од камперите во анкетата на „А1он“.
Екипата на порталот беше негодување и лутина пречекана во кампот на ВМРО-ДПМНЕ. Камперите одбиваа да дадат свое мислење и не сакаат да зборат ниту пред камера, ниту без камера. Новинарите беа непожелни, а на тоа им укажаа и некои кампери кои бараа да си заминат. Додека се движеа низ шаторите меѓу граѓаните, еден од нив на големите звучници ја пушти химната на ВМРО-ДПМНЕ до крај за да не може да се сними изјава.
-Се уште не знаеме ништо, да знаевме нешто ќе ви кажевме – велеа камперите кои одбиваа да зборуваат пред камера.
На укажувањето дека веќе се е објавено и дека прес конференција имаше и премиерот, тие одговараа:
-Нас никој ништо не ни кажал. Немаме што да кажеме. Додека не дојдат главните не можеме да даваме изјава – велеа тие.
На прашањето кој треба да дојде и да им каже што да прават, тие рекоа дека од има двајца одговорни за кампот од ВМРО-ДПМНЕ.