Цело Скопје е заробеник на неспособноста на ЈП Комунална хигиена да ја одржува хигиената на градот, обвини градоначалникот на Општина Карпош, Стевчо Јакимовски и побара со новиот закон за локална самоуправа ова јавно претпријатие да се подели меѓу општините во градот заедно со парите што ги плаќаат граѓаните за одржувањето на чистотата.
„700.000 жители на Скопје се заробеници на ЈП Комунална хигиена. Имаше изговори дека за време на рамазанските празници помалку работат, дека треба да се стрпиме. По населбите каде што требаше да ги подигнуваат кантите, па и со недели дури не доаѓаа да ги земат. Ајде и тоа да го разбереме. Изгледа сега имаат добиено шеќерен шок од рамазанските пости и гледајте ова на што личи. Вака беше изминативе 30-40 години, очигледно вака ќе биде и во наредните 40 години благодарение на ЈП Комунална хигиена и благодарение на неодговорниот однос на владата која што очигледно прави измени на законот за локална самоуправа во кој најбитно било да се смени градоначалникот ама не е најбитно и да се решат проблемите. Ова е еден од најгорливите проблеми на Карпош и на Градот Скопје. Со новиот закон за локална самоуправа и територијална поделба на Град Скопје Комунална хигиена мора да се подели по општините и мораме да го решиме проблемот со одлагањето на сметот.
Јакимовски исто така бара и законски измени со кои ќе се казнуваат сите што не го фрлаат ѓубрето во канти, затоа што владее целосна општествена неодговорност. Градоначалникот апелира и до министерот за транспорт да не ги чува измените на законот за домување и да се донесе нов закон за комунална инспекција за конечно да се решат овие проблеми и Скопје да заличи на метропола.
Малку почисто или малку понечисто било Скопје во изминатите 30 години без разлика кој градоначалник се наоѓа на власт. Ова градско претпријатие ниту може вака да функционира ниту ќе го исчисти градот. Да не зборувам за колективната хигиена која што ние како локална самоуправа во континуитет држиме некаде околу 90 одржувачи на хигиена. Во спротивно тешко нас. На што ќе ни изгледа општината и градот. Апелирам, измени во законот за локална самоуправа. Ова јавно претпријатие конечно да се подели на општините и да биде одговорноста на градоначалникот на општината. Овие луѓе што ја работат оваа работа немаат одговорност за тоа како ќе биде хигиената во градот Скопје и во општината Карпош. На крајот на краиштата, дали некој знае како се вика директорот на ЈП Комунална хигиена? Не. Затоа сите знаете како се вика градоначалникот и затоа градоначалникот треба да биде одговорен и средствата што се плаќаат за овој смет треба да доаѓаат до локалната самоуправа. Во исто време да го прашам министерот за транспорт и врски до кога мисли да ги чува измените на законот за домување, има ли намера да се донесе нов закон за комунална инспекција за овие работи конечно да ги разрешиме и да заличиме на метропола барем приближно на оние кои се во наше опкружување, а ни случајно да се споредуваме со метрополите од Европа и светот“, рече Јакимовски.