Одговорноста за спроведување на договорот од Пржино не е кај СДСМ, туку кај ВМРО-ДПМНЕ, изјави европратеникот и поранешен известувач за Македонија во Европскиот парламент, Ричард Ховит.
По денешната средба со лидерот на СДСМ, Зоран Заев, Ховит изјави дека не е доцна да се пресретне извештајот за напредок на Европската комисија со исполнување на договорот од Пржино за Македонија да не ја изгуби препораката.
-Очекуваме договорот да биде целосно исполнет. Не е доцна за извештајот на Европската унија, но на оваа земја сега веќе и остануваат часови, а не денови за договорот да се исполни. Сега е моментот – изјави тој.
Ховит им изрази поддршка на социјалдемократите во земјава.
-Овде сме затоа што очекуваме исполнување на договорот, во очекување на изборите да ви посакаме успех и да и ставиме до знаење на јавноста дека социјалдемократските политики произведуваат повеќе работни места и повеќе просперитет во сите земји во Европа. И во оваа земја гласот за социјалдемократите е глас за подобра иднина – додаде тој.
Маја Васева