На еден месец пред отстапување на министерството за внатрешни работи Зоран Заев и Оливер Спасовски го партизираат МВР, обвини денес Орце Ѓорѓиевски, член на ИК на ВМРО-ДПМНЕ и праша дали е точно дека во последните дваесет дена се примени над сто лица. Според него, кружат информации дека бројот на систематизирани места е неколку илјади над бројот на местата кои во моментов се пополнети.
„Дали после некомпетентниот Жарко Пачемски, близок соработник на Андреј Жерновски, во МВР се примени и деца на обезбедувачите на Оливер Спасовски? По кои критериуми, на кој оглас и кога е примена на работа извесна Теодора и дали таа е ќерка на припадник на неговото обезбедување?“, праша Ѓорѓиевски.
Друг феномен кој паралелно се случува во МВР Ѓорѓиевски вели дека се интерните огласи преку кои Спасовски во очи на изборите се труди да ги пополни местата кои не го интересирале изминативе четири години откако е министер.
„Се пополнуваат места на кои треба да дојдат професионалци, но очигледно СДСМ се плаши дека во таков случај, полициски службеници кои работат по закон, лесно би можеле да ги откријат сите криминали коишто се правени во МВР. Затоа прашуваме колку интерни огласи во изминатиот месец се распишани во МВР? Зошто се брза со пополнување на местата на овие кои со наредба извршуваат работни задачи токму сега? Ова ли е системот на кариера за кој се залагаа началниците на одделите за управување со човечки ресурси кога се носеше законот за внатрешни работи?“, рече Ѓорѓиевски.
Трет процес, според Ѓоргиевски, во моментов се заканите кон мнозинството професионалци кои постапуваат согласно закон и одбиваат да ги извршуваат политичките нарачки на Спасовски. Тие се казнуваат и деградираат, а десетици процеси против МВР за незаконските прераспределувања се веќе завршени во корист на оштетените.
„Врз МВР се фрла црна дамка и му е нанесена сериозна финансиска штета“, вели Ѓоѓиевски.
Тој најави дека за овие скандалозни одлуки ќе биде информирана и меѓународната заедница, а после неизбежниот пораз на изборите, рече дека ќе биде истражена одговорноста на сите кои му помагале на Спасовски во бруталните злоупотреби на овластувањата.