Стечајците повторно излегоа на протести да ја потсетат владата дека нивното прашање сеуште не е решено. Лидерката на стечајците, Лилјана Ѓеоргиевска предупреди дека власта треба да престане со притисоци и заплашувања врз стечајците и да им овозможи и тие да можат да живеат варем малку пристојно во оваа држава.
Само 6.000 денари месечно бараме, за да изиграваме, а не да бидеме нормални граѓани на ова општество. Треба да се престане со уцени, заплашувања, да има демократија, а не да ни делат прекршочни пријави за да не заплашуваат, рече Ѓеоргиевска.
Според неа со законот за обештетување на стечајците кој беше донесен пред изборите се опфатени најмногу 1700 стечајци.
-Ќе бидат обештетени, што значи дека не се толку згрижени. Тоа е манипулативен закон, делење на стечајците. Мислам дека е време владата со еден закон да ги реши сите стечајци и да се заврши со оваа работа, рече таа.
Ѓеоргиевска посочи дека поддршката што кумановскиот градоначалник Зоран Дамјановски им ја дава со нивното присуство, треба да е пример за сите градоначалници, кои според неа, треба да помогнат барем околу проблемот со комуналиите на стечајците.
Ваквото мислење не го делеа од Движењето за социјална правда „Ленка“кои дадоа поддршка на стечајците, но не и на присуството на кумановскиот градоначалник.
-Ова е политичка манипулација со стечајците, туку собира поени. Ние од Движењете за социјална правда-Ленка, упатуваме апел владата конечно да ги реши овие проблеми на стечајците. Ова е срамота што дојде и што се појави градоначалникот и ги упропасти сите напори народот да излезе масовно и со ова го направи протестот да биде партиски, рече активист на „Ленка“.