Кога кандидатите за градоначалници од редовите на СДС говорат за гасификација на општините, тие говорат за гасификација која ќе функционира по системот воспоставен во Струмица. Во градот каде Зоран Заев ја спроведе гасификацијата, граѓаните плаќаат најскап гас во цела Европа. Иронично и дрско е најевтиниот енерегенс на граѓаните да им го наплатувате поскапо и од електричната енергија. Заев, преку фирмите на неговите соработници и роднини, злоупотребувајќи ја функцијата градоначалник, создаде милиони кои ги извлече од џебовите на струмичани продавјаќи им гас од партиските фирми, рече Соња Гелова Стојанова.
Таа додаде дека човекот кој ветувал живот за сите во Македонија, доделувал тендери на фирма во сопственост на неговите татко и чичко, Пане Заев и Љупчо Заев.
– Доказ за злоупотребата на Општината и непотизмот кај Заев е фирмата ЗОВИ-ПРОМЕТ од Струмица, која доби тендер за набавка на прехранбени и хигиенски производи во вредност од над 3 милиони денари од Јавната општинска установа „Детска радост“ – Струмица. Оваа фирма до минатата година, од Заев добила 7 тендери со вкупна вредност од над 30 милиони денари. Кога Заев вели дека Македонија ќе ја направи како Струмица, граѓаните знаат дека планира во Македонија да цвета непотизмот, корупцијата и злоупотребата на функцијата, рече Гелова Стојанова.
Како што кажа таа, ветуваа живот за сите, а пристигна живот само за бизнис партнерите на Заев, додека за останатите пристигнало помрачување.
– Додека манипулираа со ветувања за 500 евра плата, а платите ги намалија, Заев и неговите соработници инкасираа милиони на своите сметки. Остануваат уште три дена до 15-ти октомври, денот кога на СДС ќе му биде испорачана казната од граѓаните за ваквата погубна политика, рече Гелова Стојанова.