На денешната седница на Националниот совет за евроинтеграција, претседателот на СДСМ, Венко Филипче, упати сериозни критики за состојбата со реформите и европскиот пат на државата, нагласувајќи дека Македонија стои во место, а владата нема политичка волја за суштински реформи.
„Јасно кажува овој извештај, дека реформи нема, го губиме времето. Ова е еден од најлошите извештаи кои што државата го добила. Полош е само тој во 2015 година, кога сме оценети како заробена држава.“ рече Филипче.
Тој истакна дека нема напредок во клучни области и дека државата ризикува нови услови за отворање на преговорите.
„Нема напредок во клучните области. Од тука се гледа дека оваа влада нема политичка волја да ги направи реформите, жалам што денеска слушам, дека денеска и овој период не бил време за реформи. Ако до минатата година имаше само еден услов, после еден таков извештај, не сум сигурен дека понатаму нема да имаме и други услови.“ додаде Филипче.
Филипче ги истакна забелешките на Европската комисија за правосудството, борбата против корупцијата, медиумските реформи, економијата и образованието, сектори во кои, според ЕК, нема напредок или е забележано назадување.
„Генералната независност и финансиска автономија на правосудството се поткопани. Нема напредок ниту во борбата против корупцијата. Владата нема напредок во клучни реформи поврзани со економските критериуми. Никој нема да биде крив, целата одговорност е во владината коалиција на ВМРО-ДПМНЕ, ЗНАМ и ВЛЕН. “ потенцираше Филипче.
„Генералната независност и финансиска автономија на правосудството се поткопани со вмешување и притисок од други гранки на власта за притисок врз членовите на судскиот совет“, рече Филипче.
Филипче исто така нагласи дека во извештајот Европската комисија се задржува на три клучни препораки кои Владата мора итно да ги исполни, а тоа се донесувањето на Закон за парнична постапка, согласно европското законодавство, закон кој се носи со двотретинско мнозинство и кој беше во Собраниска поставка во претходниот Собраниски состав и забрзана имплементација на стратегијата за реформи во судството.
Дополнително, тој предупреди дека Европската комисија бара и доследна примена и унапредување на АКМИС-системот за електронско управување со судските предмети, бидејќи токму транспарентното распределување на предметите е основен предуслов за независно судство.
„Нема напредок ниту во борбата против корупцијата, според Европската комисија таа станува доминантна во многу области и претставува предмет на сериозна загриженост. Јавното обвинителство треба да се зајакне кадровски во истражните центри и да ја подобри ефикасноста на работата во случаите на висока корупција. Клучни препораки за борба против корупција“, рече Филипче.
Филипче зборуваше и за корупцијата која станува доминантна во многу области и претставува предмет на сериозна загриженост по што ги кажа и клучните препораки кои Европската комисија ги издвоји и кои македонското законодавство треба да ги донесе.
„Донесување на нов кривичен закон за ефикасна борба против корупцијата. Подобрување на имплементацијата на антикорупциска стратегија, споредување на препораките на Греко и соодветна подготовка на нова антикорупциска стратегија, 2026-2030 години. Понатаму, доволно човечки финансиски ресурси на јавното обвинителство и сите негови структури“, рече претседателот на Националниот совет за евроинтеграции.