Длабока шахта која се наоѓа во парк зад неколку згради, место каде си играат многу деца и се шетаат домашни миленици е отворена и преставува безбедносен ризик. Шахтата е во населбата Карпош 4.
Како што се гледа на видеото низ шахтата тече вода и е прилично длабока.
„ Се гледа на фотографиите колку е длабока, а на видеото може да се види дека водата во неа ем е длабока ем брзо тече. Не сакам ни да помислам што би се случило некој миленик или не дај боже дете да пропадне во неа“ вели за А1он загрижен граѓанин.
Според информациите кои ги добивме се работи за колектор на отпадни води. Во оваа шахта се сливаат отпадни води од неколку локации од овој дел од населбата Карпош 4.
Од Општина Карпош не информираат дека веднаш откако ја добиле дојавата од граѓаните ги алармирале од Водовод кој се надлежни. Од таму ги информирале дека итно ќе реагираат и екипи веднаш се испратени на терен за да ја покријат шахтата соодветно.
Нема информација кој и зошто ја отворил шахтата, бидејќи капакот кој дотогаш бил на своето место, го нема во околината.