Десетици полицајци од повеќе различни единици вечерва се пред болницата “8 септември”, по пријава од докторка која добивала закани од роднини на лице кое починало откако било хоспитализирано во ковид-центарот.
Неофицијално, инцидентот започнал со расправија за тоа дали починатата жена која била хоспитализирана имала или нема коронавирус. Роднините наводно сакале да го подигнат телото без протоколот кој се спроведува за сите починати лица во изминатиот период поради епидемијата.
Исто така, едниот од роднините кој се заканувал, бил позитивен на коронавирусот. Дојавата до полицијата била дека роднините, меѓу кои бил и синот на починатата жена, се вооружени, но полицијата утврдила дека не биле.
Пред болницата има пет полициски возила и едно комбе, како и униформирани полицајци и припадници на интервентната полиција.
МВР повеќе детали најавува за подоцна.