Централниот одбор на СДСМ донесе одлука да учествуваат на избори, доколку се одржат локални заедно со предвремени парламентарни, и доколку се исполнат условите тие да бидат фер и демократски.
Изборите да бидат организирани од Влада со кредибилитет, а посебно личностите кои ќе ги раководат секторите финансии, правда и внатрешни работи, како и јавниот сервис МРТ, да бидат личности прифатливи за сите, лица со капацитет и кредибилитет. СДСМ инсистира на вградување на сите забелешки во Изборниот законик дадени од ОБСЕ/ОДИХР и целосно да се прочисти избирачкиот список.
Ова е предлогот за излез од кризата.
„Подготвени сме за започнување разговори веднаш со владеачките партии. Ако одбијат, битката ја продолжуваме со улична демократија и граѓанска отпор. Целата одговорност за нелегитимни избори ќе ја носи актуеланат власт“, рече на прес конференција, лидерот на СДСМ, Бранко Црвенковски.
Одлуката, рече е донесена едносгласно од сите присутни на седницата на Централниот одбор, вклучувајќи ги и пратениците и градоначалниците, како и кандидатите за градоначалници.
Власта, потенцираше, нема кредибилитет да организира фер и демократски избори, а ако учествува опозицијата само на локални избори ќе и даде легитимност на власта која воведе полициска диктатура.