Славчо Чадиев кандидат на ВМРО-ДПМНЕ за градоначалник на Општина Велес денеска на прес – конференција го презентира според него најзначајниот прект во неговата програма 2013 – 2017, а тоа е новиот режим на сообраќајот на градот.
Новиот режим на сообраќај би содржел изградба на кружни текови, поставување семафори и решавање на партерното паркирање на Велес. Крајниот рок на неговата реализација на централните градски улици, а кој би чинел 7 милиони денари е 2014 година.
– Со воведување на светлосна сигнализација и изградба на предвидените кружни текови се поедноставува сообраќајот во градот, се намалува брзината на движење на возилата, а од голема корист е и зголемувањето на безбедноста за сите учесници во сообраќајот. За таа цел уште во текот на оваа година ќе се премине кон реализција на кружен тек на влезот во Велес (кај Штипско џаде) и кружен тек кај Авона (Железничка зграда), како и соодветно уредување на просторот околку нив, нагласи Чадиев.
Во понатамошниот период, најави тој, ќе следи поставување семафори на местото кај новата Театарска зграда, како и враќање на двонасочниот сообраќај до свиокот за Болница. Чадиев вети дека доколку ја добијат довербата од граѓаните, со голем ентузијазам, знаење и искуство ќе работат на изградбата на поубав, модерен град, град на среќни и задоволни граѓани.