Очекуваме дека двете страни ќе тргнат од реална платформа, не само да разменат максималистички позиции и ќе се обидат да создадат услови што ќе овозможат опозицијата да се врати во Парламентот бидејќи парламент без опозиција е нецелосен, вели амбасадорот на ОБСЕ во Македонија, Ралф Брет во интервју на Радио Слободна Европа.
Амбасадорот Брет иако не гледа негативно на резултатите од договорот од 1 март, се согласува дека дел од договореното не се исполни.
-Се согласувам дека не е сè исполнето, но барем се постигна опозицијата да се врати и беa донесени одредени заеднички одлуки, но се согласувам дека политичкиот процес е секогаш со „обиди и грешки“ и сите инволвирани актери мора да научат дека сè уште треба да се развива демократска култура – вели Брет.
Во врска со партизирањето на државата амбасадорот Берт смета дека коренот е во менталитетот на победници и поразени.
-Тенденцијата е победниците, оние кои освоиле мнозинство ја преземаат целосната моќ и преземаат силна контрола. Решението би било во тоа да се развие култура на поголема вклученост на опозицијата, поголема вклученост на одлуките и поголема вклученост на правата на опозицијата- вели тој
Амбасадорот Берт смета дека Македонија е поблиску до НАТО отколку до ЕУ.
-Што се однесува на НАТО, морам да кажам дека земјата е многу блиску до членство и потребно е само еден проблем да се реши. Мислам дека досега многу е направено. Слушам од колегите од НАТО дека хармонизацијата во делот на командната структура и армискиот систем се унапредува. Што се однесува на ЕУ, патот се разбира е многу подолг, но постои препорака од ЕК за отпочнување преговори во пет наврати. Така што многу е направено, но исто така постои истиот проблем околу спорот за името и неколку други – вели амбасадорот на ОБСЕ во Македонија Ралф Брет во интервју за Радио Слободна Еропа.