Валентин Божиноски од СДСМ Прилеп денеска на прес-конференција изјави дека бојкотот, деструкцијата и делувањето спротивно на интересите на граѓаните што ВМРО-ДПМНЕ го спроведува во Советот на Општина Прилеп, се потврда за безидејноста и очајот во кој што се длабоко заглавени.
– Советниците на ВМРО-ДПМНЕ не учествуваат во работата на Советот на Општина Прилеп, а бесрамно го земат советничкиот хонорар од околу 15 илјади денари. Исто како и на пратениците од нивната партија, на советниците од ВМРО-ДПМНЕ, воопшто не им се важни интересите и потребите на граѓаните што ги претставуваат, туку единствено се грижат за сопствените џебови. Побегнаа од седницата на Совет кога се обезбедуваше објект за стотина деца од Прилеп кои боледуваат од церебрална парализа! Не гласаа и немаа слух за потребите на овие деца и нивните намачени родители. Побегнаа и вчера, кога Советот на Општина Прилеп донесе одлука за воведување бесплатен градски превоз за пензионерите. Не ги почитуваат ниту пензионерите, ниту нивните потреби, рече Божиноски.
Тој додаде дека пред да побегнат од седниците, советниците на ВМРО-ДПМНЕ редовно се потпишуваат за подигнување на месечниот паушал.
– И покрај ваквата деструктивност на ВМРО-ДПМНЕ, Владата предводена од СДСМ, Советот на Општина Прилеп и градоначалникот Илија Јованоски, ќе продолжат со засилено темпо да работат на исполнување на ветените мерки и проекти. Веќе се обезбедени средствата за приклучување струја за граѓаните од населбата „Три Багреми“. Обезбеден е објект и средства за опремување на Дневен центар за деца со церебрална парализа. Во постапка е процедурата за обезбедување средства за проширување и подобрување на капацитетите за сместување деца во градинките и промена на дограмата во старскиот дом, рече Божиноски.
Тој истакна дека асфалтирани се неколку улици, а ќе се асфалтирале и тампонирале и многу други во идниот период.