Исклучително тешкиот терен, Ветерот кој што честопати денеска го смени правецот како и високите температури го отежнуваат гаснењето на пожарот на планината Серта, објави директорот на Центарот за управување со кризи Стојанче Ангелов.
„Од рано наутро гасневме со еден полициски хеликоптер и со два армиски хеликоптери, а нешто подоцна и со два ер-трактори на Дирекцијата за заштита и спасување, но и покрај тоа за жал, огнот повторно гори. Војската е активна на терен со 103 војници кои учествуваат во гаснењето на пожарот како и 30 припадници на МВР, кои даваат голем допринос на локалните пожарникари и локалното население,“ изјави Ангелов.
Тој додаде дека контролата врз пожарот не очекува да биде воспоставена денеска, гаснењето ќе продолжи додека има видливост на текот на денот, а утре повторно ќе се продолжи со гаснење со воздухопловна поддршка.
Попладнево реагираа од опозициската СДСМ. Велат дека поради ненавремената реакција на властите изгореле 1000 хектари зеленило.
– Задоцнета и ненавремена беше реакцијата на надлежните и Владата на Мицкоски за справување со пожарите во Неготино и регионот. Заради слабата координација и немарност, изгореа преку 1000 хектари зеленило и се донесоа во опасност преку 150 куќи. ВМРО-ДПМНЕ ветуваше ефикасност, но само по првата криза се покажа дека не умеат да се носат со предизвиците. Цели два дена доцнеше механизација и прогалсувањето на кризна состојба. Откако СДСМ вчера вечер алармираше, дури по три часа Владата се смогна да прогласи кризна состојба. Навремена и соодветна реакција ќе спасеше значителна површина на зеленило и немаше да се доведат во опсност викенд населбата Калањево. ВМРО-ДПМНЕ мора да сфати дека со лажен ПР и постојани вести нема да ја покријат неспособноста на терен, се вели во соопштението од партијата.