Со кампања која чини над 400.000 евра народни пари, владата ќе ги учи граѓаните да се хранат здраво. Во екот на лекции што е здраво и неопходно да се конзумира, но и потенцирањето на важноста за правилен начин на живот, гевгеличани сеуште пијат вода со присуство на арсен над дозволеното.
Граѓанската иницијатива „Арсена“ која постојано апелира за опасноста од присуството на арсен во водата во градскиот водовод, на ранливата категорија граѓани им донираше 300 литри пакувана вода.
Граѓаните кои добија здрава вода за пиење поради нискиот стандард и скромните примања велат дека не можат да си дозволат да купуваат пакувана вода и ја пијат онаа од градскиот водовод.
Еве денес на телевизија премиерот вели да сме јаделе грав и леќа. Ако го сварам гравот со арсенова вода, што ќе добијам?“ – се прашува загрижена гевгеличанка.
„На маж ми докторите му забранија да пие вода од чешма. Бубрезите му се воспалуваат, му се покачува шеќерот. Со малите примања, кога можеме купуваме вода, кога не можеме пиеме од чешма и болеста му се влошува. Нема спас“, се пожали една гевгеличанка.
Активистите на „Арсена“ заедно со пакуваната вода до граѓаните ги споделија и пораките дека тие како граѓанска асоцијација имаат доставено иницијативи до Советот на општина Гевгелија за решавање на проблемот со арсенот во водата. До изнаоѓање на трајно решение тие бараат граѓаните да бидат субвенционирани со здрава пакувана вода, а водата што ја добираат преку градскиот водовод да се плаќа по цена за техничка вода наменета само за санитарни цели.