„Абортусот е најголема закана за светскиот мир!!!“ – бакарна плоча со овој цитат од Мајка Тереза го краси влезот на Порта Македонија (Триумфална капија) во центарот на Скопје.
Табли со цитати од Мајка Тереза се поставени на неколку локации низ градот, главно на објектите од „Скопје 2014“, од кои повеќе се државни инстиуции.
Овие цитати го промовираат делото на Мајка Тереза, но изборот на цитатите и местата, односно институциите каде што се поставени создаваат парадоксални комбинации на значења. Така на влезот на Јавното обвинителство кое сигурно не асоцира на љубов и среќа, пишува:
„Ајде да се среќаваме едни со други со насмевка, бидејќи насмевката е почеток на љубовта“.
Уште попарадоксално е значањето кое го добива цитатот „Една од најтешките болести е секому да си никој“, кој е поставен на влезот на Министерството за надворешни работи. На зградата на АЕК, пак стои натписот: „Се’ што не е дарувано, е изгубено“.
Останува нејасно како се избирани овие цитати и во каква врска се со дејностите што ги извршуваат овие државни институции.
Главните влезови на државните институции имаат по два натписи, а на зградата на Обвинителството се поставени дури три, за кои не се знае кои ги нарачал.